నేటి గద్దర్, మే 12, భద్రాద్రి కొత్తగూడెం :
ప్రమాదవశాత్తు ఆర్టీసీ పల్లె వెలుగు బస్సు అదుపుతప్పి కాలువలోకి దూసుకు వెళ్లిన సంఘటన ఆదివారం భద్రాద్రి కొత్తగూడెం జిల్లా బూర్గంపాడు మండల పరిధిలోని సారపాక గ్రామ శివారులో చోటుచేసుకుంది. ఘటనకు సంబంధించి స్థానికులు తెలిపిన వివరాలు ఇలా ఉన్నాయి… మణుగూరు నుంచి భద్రాచలం వెళుతున్న మణుగూరు డిపోకు చెందిన TS 28 A 2219 అనే నెంబర్ గల ఆర్టీసీ పల్లె వెలుగు బస్సు బూర్గంపాడు మండల పరిధిలోని మోతే గ్రామం దాటిన తర్వాత ఎదురుగా వస్తున్న వాహనాన్ని తప్పించబోయిన సందర్భంలో బ్రేక్ ఫెయిల్ అయ్యి అదుపుతప్పడంతో ప్రధాన రహదారి పక్కనే ఉన్న కాలువలోకి దూసుకు వెళ్ళింది. ప్రమాదం జరిగిన సమయంలో బస్సులో సుమారు 40 మంది ప్రయాణికులు ఉన్నట్లు స్థానికులు తెలుపుతున్నారు. ప్రయాణికులలో 20 మందికి స్వల్ప గాయాలు కాగా సుమారు పదిమంది ప్రయాణికులు తీవ్రంగా గాయపడినట్లు సమాచారం. స్థానికులు స్పందించి క్షతగాత్రులను ఆసుపత్రికి తరలించారు. ప్రమాదంలో ప్రస్తుతానికి ఎటువంటి ప్రాణహాని జరగకపోవడంతో పెద్ద ప్రమాదం తప్పిందని స్థానికులు పేర్కొంటున్నారు. సమాచారం అందుకున్న బూర్గంపాడు పోలీసులు హుటాహుటిన సంఘటన స్థలానికి చేరుకుని వివరాల సేకరిస్తున్నారు.
