★ఐ ఎఫ్ టి యు ఆధ్వర్యంలో పినపాక MLA పాయం వెంకటేశ్వర్లు కు వినతి పత్రం అందజేత…
నేటి గద్దర్ న్యూస్,ప్రత్యేక ప్రతినిధి మణుగూరు జూన్ 11:
పినపాక నియోజకవర్గం పరిధిలోని గిరిజన ఆదివాసి గ్రామాల మౌలిక సౌకర్యాల కల్పనకు రాష్ట్ర ప్రభుత్వం చర్యలు చేపట్టాలని కోరుతూ భారత కార్మిక సంఘాల సమాఖ్య (ఐ ఎఫ్ టి యు)ఆధ్వర్యంలో మంగళవారం పినపాక శాసనసభ్యులు పాయం వెంకటేశ్వర్లు కు వినతి పత్రం అందజేశారు.ఈ సందర్భంగా గోదావరి లోయ బొగ్గు గని కార్మిక సంఘం రాష్ట్ర కార్యదర్శి ఎస్ డి నాసర్ పాషా మాట్లాడుతూ,పినపాక నియోజకవర్గ పరిధిలోని మణుగూరు,అశ్వాపురం, పినపాక మండలాల్లోని ఆదివాసి గిరిజన గ్రామాలైన బుగ్గ,ఖమ్మం తోగు,బుడుగుల, రేగుల గండి,రాయన్నపేట,సర్వాయి గుంపు, పెద్దిపల్లి,విప్పల గుంపు,కుమ్మరి గుంపు, మనుబోతుల గూడెం,మామిళ్ళవాయి, గుండ్ల సాగర్,బండ్ల గుంపు,వెంకటాపురం, పిట్టతోగు,రేగళ్ల,సుందరయ్యనగర్,ఉమేష్ చంద్రనగర్,ఎస్టి కాలనీ గుంపు,వేగులూరు, సీతానగర్ తదితర ఆదివాసి గిరిజన గ్రామాలలో రహదారి సౌకర్యం,విద్యుత్ సౌకర్యం,త్రాగునీటి సౌకర్యం లేక ఆదివాసీలు ఎంతగానో ఇబ్బంది పడుతున్న పరిస్థితి ఉందని ఆవేదన వ్యక్తం చేశారు.రహదారి లేక ఈ వర్షాకాలంలో చాలా ఇబ్బంది పడే పరిస్థితి ఉందని,కొన్ని గ్రామాలలో ప్రాథమిక పాఠశాలలు కూడా లేవని అన్నారు.ఏనుముల రేవంత్ రెడ్డి కాంగ్రెస్ ప్రభుత్వం అధికారంలోకి వస్తే తమ గ్రామాలు అభివృద్ధి చెందుతాయని ఆదివాసీలు ఎంతో ఆశతో ఎదురు చూస్తున్నారని ఆయన అన్నారు.ఎన్నికల కోడ్ కూడా ముగిసింది కనుక పైన తెలిపిన ఆదివాసి గ్రామాలలో మౌలిక సదుపాయాల కల్పనకు రాష్ట్ర ప్రభుత్వం తగు చర్యలు చేపట్టాలని కోరారు.అదే విధంగా వర్షాకాలం నేపథ్యంలో సీజనల్ వ్యాధులు ప్రబలే అవకాశం ఉందని ఆదివాసి గూడేలలో ముందస్తు ఆరోగ్య అవగాహన కార్యక్రమాల నిర్వహణతో పాటు ప్రభుత్వం ఉచిత దోమ తెరల పంపిణీకి తగు ఏర్పాట్లు చేయాలని, మణుగూరు ప్రభుత్వ వంద పడకల ఆసుపత్రిలో మెరుగైన వైద్యానికి ఏర్పాట్లు చేయాలని కోరారు.ఈ కార్యక్రమంలో ఐ ఎఫ్ టి యు ఏరియా అధ్యక్షులు ఏ మంగీలాల్ పలువురు ఆదివాసీలు పాల్గొన్నారు.
