జూలూరుపాడు, జూలై 12, నేటి గద్దర్ : మండల కేంద్రంలోని పెండ్యాల భాగ్యమ్మ మెమోరియల్ ప్రాథమిక పాఠశాలలో సుదీర్ఘంగా పనిచేసి బదిలీపై వెళుతున్న ఉపాధ్యాయులను, పాఠశాల ప్రస్తుత సిబ్బంది శుక్రవారం ఘనంగా సన్మానించారు. పాఠశాలలో 13 సంవత్సరాల పాటు పిల్లలకు విద్య బుద్ధులు నేర్పిన ధారావత్ భాస్కర్ తన బదిలీ సందర్భంగా పాఠశాలకు 13 వేల రూపాయల విలువగల ఎల్ఈడి టీవీ ని అందించారు. ఉపాధ్యాయుని వాకపల్లి గీత పాఠశాల తరగతి గదులకు గోడ గడియారాలను అందించారు. మరో ఉపాధ్యాయుని స్వర్ణ పాఠశాలకు ఆరు కుర్చీలను బహుకరించారు. కార్యక్రమంలో మండల విద్యాశాఖ అధికారి జి వెంకట్, కాంప్లెక్స్ హెడ్మాస్టర్ వెంకట నరసయ్య, సీనియర్ ఉపాధ్యాయులు రామిశెట్టి శ్రీనివాసరావు, పాఠశాల సిబ్బందితోపాటు విద్యార్థుల తల్లిదండ్రులు పాల్గొన్నారు.
