■సమత జడ్జి మెంట్ ప్రకారమే నియామకాలు జరగాలి…
■ఏజెన్సీ ప్రాంతంలో 1997 సమత జడ్జిమెంట్ ను అమలు చేయాలని చట్టం చెపుతున్నా పట్టించుకోని సింగరేణి అధికారులు…
■సుప్రీం కోర్టు ఆర్డర్ ప్రకారం ఆదివాసీలకే ఉద్యోగ,ఉపాధి అవకాశాలు కల్పించాలి…
■సుప్రీం కోర్టు తీర్పు కు వ్యతిరేకంగా నియామకాలు జరిగితే సంబంధిత సింగరేణి అధికారులపై న్యాయ స్థానాలను ఆశ్రయిస్తాం…ఆదివాసీ జేఏసీ.
నేటి గదర్ న్యూస్,ప్రత్యేక ప్రతినిధి మణుగూరు జులై 20:
భద్రాద్రి కొత్తగూడెం జిల్లా మణుగూరు మండలంలోని మణుగూరు సింగరేణి పాఠశాలలో అవుట్ సోర్సింగ్ ఉద్యోగ నియామకాలు సుప్రీంకోర్టు ఆర్డర్ ప్రకారంగా స్థానిక ఆదివాసీలకు, సింగరేణి భూ నిర్వాసిత యువతి యువకులకు మాత్రమే ఇవ్వాలని ఆదేశాలు ఉన్నాయి.సమత జడ్జిమెంట్ (1997) చట్ట ప్రకారం అమలు చేస్తూ ఆదివాసీలకు,సింగరేణి భూ నిర్వాసిత యువతి యువకులకు మాత్రమే అవుట్ సోర్సింగ్ ఉద్యోగాలు,పర్మినెంట్ ఉద్యోగాలు ఇవ్వాలని చట్టం చెబుతున్న స్థానిక సింగరేణి అధికారులు మాత్రం ఏ చట్టాలను పట్టించుకోకుండా వారికి నచ్చినట్లుగా ఉద్యోగాలను అమ్ముకుంటున్నారని, గతంలో (12-07-2024) న డెమో ఇంటర్వ్యూలో కేవలం దొడ్డిదారిన సెటిల్మెంట్ చేసుకున్న అభ్యర్థులకు మాత్రమే డెమో నిర్వహించడం జరిగిందని,ఆరోపణలు వెల్లువెత్తగా జిల్లా యంత్రాంగం జ్యోక్యం చేసుకోవడంతో నిర్వహించిన డెమోలను రద్దు చేశారు.కానీ అధికారం హోదా ఉన్నంత సేపు బుద్ధి మారదన్నట్లుగా మళ్ళీ వారి అభ్యర్థులకే ఇవ్వడం కోసం రహస్య చర్చలు జరుపుతూ,ఆదివాసీలకు మొండిచెయ్యి చూపిస్తున్నారని ఆదివాసీ నిరుద్యోగులు ఆవేదన వ్యక్తం చేస్తున్నారు.అందు చేతనే నాడు సెలెక్టెడ్ అభ్యర్థుల వివరాలు రహస్యంగా ఉంచారని పలువురు చర్చించుకుంటున్నారని వారు వాపోయారు.ఈ విధముగా డబ్బుకు అమ్ముకుంటే విద్యార్థుల చదువులు ప్రశ్నార్థకమేనని ఆరోపిస్తున్నారు.మళ్ళీ ఆ ఇద్దరి సమక్షంలోనే డేమోలు నిర్వహిస్తే, విద్యార్థుల భవిష్యత్తు నాశనం అవుతుందని మండిపడ్డారు.ఆ ఇద్దరి ప్రమేయం లేకుండా ఇతర సింగరేణి ఉన్నత స్థాయి అధికారుల సమక్షంలో సమత జడ్జిమెంట్ ప్రకారం నిర్వహించాలని కోరారు.ఏజెన్సీ చట్టాలకు అనర్హులైనటువంటి గిరిజనేతరుల దరఖాస్తులు స్వీకరించకూడదని మణుగూరు ఆదివాసీ జేఏసీ తరపున సింగరేణి ఎస్ఓ టు జిఎం కు వినతి పత్రాన్ని అందజేశారు.చట్ట ప్రకారం అమలు చేయని పక్షాన సంబంధిత సింగరేణి అధికారులపై న్యాయ స్థానాలను ఆశ్రయిస్తామని హెచ్చరించారు.ఈ కార్యక్రమంలో మణుగూరు ఆదివాసీ జేఏసీ అధ్యక్షుడు సోడే రవికుమార్ దొర, ఉపాధ్యక్షులు పూనెం రమేష్ దొర, గనిబోయిన ముత్తయ్య, కార్యదర్శి పూనెం నాగరాజు,శ్రీను తదితరులు పాల్గొన్నారు.
