* *ఆటో డ్రైవర్ల సంఘం జిల్లా మహాసభ కరపత్రాలు ఆవిష్కరణ*
*హనుమకొండ జిల్లా*
*14 నవంబర్ 2024*
ఆటో డ్రైవర్లకు ప్రభుత్వం ఇచ్చిన హామీలను అమలు చేయాలని, ఆటో కార్మికులకు సంక్షేమ బోర్డు ఏర్పాటు చేయడంతో పాటు సమస్యలు పరిష్కరించాలని ప్రభుత్వాన్ని డిమాండ్ చేస్తూ ఈనెల 17న ఏఐటీయూసీ జిల్లా అధ్యక్ష కార్యదర్శులు వేల్పుల సారంగపాణి, జక్కు రాజు గౌడ్ లు పిలుపునిచ్చారు. గురువారం రోజున హనుమకొండ బాలసముద్రంలోని ఏఐటీయూసీ జిల్లా కార్యాలయంలో ఏఐటీయూసీ అనుబంధ యూనియన్ ఆటో డ్రైవర్ల సంఘం జిల్లా ప్రథమ మహాసభల కరపత్రాలను ఏఐటీయూసీ మరియు ఆటో డ్రైవర్ల సంఘం నాయకులు విడుదల చేశారు. ఈ సందర్బంగా ఏఐటీయూసీ జిల్లా అధ్యక్ష, కార్యదర్శులు వేల్పుల సారంగపాణి, జక్కు రాజు గౌడ్ లు మాట్లాడుతూ
పాలక ప్రభుత్వాలు మారిన ఆటో డ్రైవర్ల సమస్యలు మారడం లేదని, ఉన్నత చదువులు చదివినా ఉద్యోగాలు లేక వయస్సు పైబడినా నిరుద్యోగులు కూడా ఆటో నడుపుతూ జీవనం సాగిస్తున్నారని, ఆపద ఉంది అంటే నేను ఉన్నానని ముందుకు వచ్చి వారిని అర్థరాత్రి వేళల్లో హాస్పిటల్ కు గాని, వారి గమ్య స్థానాలకు చేర్చే వారదులు ఆటో డ్రైవర్లని తెలిపారు. గత బిఆర్ఎస్ సర్కార్ ఆటో డ్రైవర్ల సమస్యలను పెడ చెవిన పెట్టడంతో దానిని గద్దె దింపి కాంగ్రెస్ అధికారంలోకి రావడంలో ఆటో డ్రైవర్లు కీలక పాత్ర పోషించారని గుర్తుచేశారు. కాంగ్రెస్ సర్కార్ అధికారంలోకి వచ్చి 11 నెలలు గడిచినా ఇంకా కార్మికుల సమస్యలు ఎక్కడ వేసిన గొంగడి అక్కడే అన్న చందంగా తయారైందని విమర్శించారు. గత పాలకుల లాగే ఆటో కార్మిక డ్రైవర్ల సమస్యలు పరిష్కారానికి నోచుకోలేదని ఆవేదన వ్యక్తం చేశారు. ఆటో డ్రైవర్లు అనేక సమస్యలతో సతమతమవుతున్నారని, ఆటో కార్మికులకు సంక్షేమ బోర్డు లేకపోవడంతో కార్మికులకు చెందాల్సిన ప్రయోజనాలు అందడం లేదని అన్నారు.ఈ ప్రభుత్వం ఏకంగా మహాలక్ష్మి పథకాన్ని ప్రవేశపెట్టి ఆటో కార్మికుల కుటుంబాలను వీధిన పడవేసిందని, మహాలక్ష్మి పథకం ద్వారా నష్టపోతున్న ఆటో డ్రైవర్లను ప్రభుత్వ ఆదుకుంటుందని స్వయంగా సీఎం రేవంత్ రెడ్డి చెప్పిన మాట ఇంతవరకు అమలుకు నోచుకోకపోవడం దారణమని అన్నారు. ఇకనైనా రాష్ట్ర ప్రభుత్వం ఆటో డ్రైవర్లకు ఇచ్చిన హామీలను అమలు చేయాలని, మహాలక్ష్మి పథకం ద్వారా నష్టపోయిన ఆటో క్యాబ్ డ్రైవర్లను ఆదుకోవాలని, ఆటో క్యాబ్ డ్రైవర్లకు సంవత్సరానికి 12 వేల రూపాయలు వెంటనే ఇవ్వాలని, రవాణా రంగ కార్మికులకు సంక్షేమ బోర్డు ఏర్పాటు చేయాలని, యాక్సిడెంట్ ఇన్సూరెన్స్ రూ.10లక్షలకు పెంచి సాధారణ మరణాలకు వర్తింపచేయాలని, 2019 మోటార్ వాహనాల చట్టాన్ని రద్దు చేయాలని, అర్హులైన ఆటో డ్రైవర్లకు ఇందిరమ్మ ఇండ్లు ఇవ్వాలని, 60 సంవత్సరాలు నిండిన డ్రైవర్లకు వృద్ధాప్య పెన్షన్ ఇవ్వాలని ,ఈనెల 17వ తేదీన హనుమకొండ బాలసముద్రంలో ఆటో డ్రైవర్ల సంఘం జిల్లా ప్రథమ మహాసభలు జరగనున్నాయని, ఈ మహాసభలను ఆటో డ్రైవర్ల విజయవంతం చేయాలని పిలుపునిచ్చారు. ఈ కార్యక్రమంలో ఏఐటీయూసీ జిల్లా మాలోతు శంకర్ నాయక్, హనుమకొండ జిల్లా ఏఐటియుసి సహాయ కార్యదర్శి రామ రాజేష్ ఖన్నా, రేణుకుంట్ల దుర్గ ప్రసాద్, లంక దాసరి అశోక్, సహాయ కార్యదర్శి గుంటి రాజేందర్, ఇల్లందల రాములు, జిల్లా నాయకులు ఆర్ పూర్ణ చందర్, విజయ్ కుమార్, వి. వెంకన్న, మేకల శంకర్, ఆర్.కుమార్ తదితరులు పాల్గొన్నారు.
