ఆ ఐదు పంచాయతీలపై ‘పొదెం’ పట్టు…

◆ తెలంగాణలోని భద్రాచలం రెవెన్యూ డివిజన్ లో కలపాలసిందే

◆సీఎం రేవంత్ రెడ్డి, డిప్యూటీ సీఎం బట్టి విక్రమార్క ను కలిసిన పొదేం వీరయ్య

◆ఇద్దరు సీఎంల భేటీ నేపథ్యంలో
ఆ ఐదు పంచాయతీలతోనే పుణ్యక్షేత్రానికి పూర్వ వైభవం

◆సీఎం, డిప్యూటీ సీఎం లకు కు విన్నవించిన పొదెం

– *సానుకూలంగా స్పందించిన సీఎం, డిప్యూటీ సీఎం లు*

– *కాంగ్రెస్ మేనిఫెస్టోలో ఐదు గ్రామ పంచాయతీల వ్యవహారం*

– *పొదెం ముందడుగుపై సర్వత్రా హర్షాతిరేఖాలు*

నేటి గదర్ న్యూస్, భద్రాచలం :

ముంపు విభజన నేపథ్యంలో ఆంధ్రాలో కలిసిన ఐదు గ్రామపంచాయతీలను తిరిగి భద్రాచలంలో కలుపుతూ తెలంగాణకు తీసుకురావాలని ఏఐసీసీ మెంబర్, టిపిసిసి సీనియర్ ఉపాధ్యక్షులు, భద్రాద్రి కొత్తగూడెం కాంగ్రెస్ జిల్లా అధ్యక్షులు, భద్రాచలం మాజీ ఎమ్మెల్యే పొదెం వీరయ్య గారు తెలంగాణ రాష్ట్ర ముఖ్యమంత్రి రేవంత్ రెడ్డి గారిని హైదరాబాదులో కలిసి విన్నవించారు. ఈ మేరకు పొదెం వీరయ్య గారు సీఎంకు వినతి పత్రం సమర్పించారు. తెలంగాణ రాష్ట్ర డిప్యూటీ సీఎం మల్లు భట్టి విక్రమార్క ని కూడా కలిసి వినతిపత్రం సమర్పించారు.

భద్రాచలంకు చెందిన ఆంధ్రాలో కలిపిన ఎటపాక, కన్నాయిగూడెం, పిచ్చుకలపాడు, పురుషోత్తపట్నం, గుండాల తదితర గ్రామపంచాయతీలను తిరిగి భద్రాచలం మండలంలో చేర్చాల్సిన అవసరం ఉందని సీఎంకు తెలిపారు. భద్రాచలం పట్టణం తప్ప, పట్టణాన్ని ఆనుకొని ఉన్న రూరల్ ప్రాంతమంతా ఆంధ్రాలో కలవటం వల్ల పుణ్యక్షేత్రంలో భూ సమస్య ఏర్పడిందని, కనీసం చెత్త వేసుకోవటానికి కూడా స్థలంలేని పరిస్థితి నెలకొందని ఈ ఐదు పంచాయతీలను భద్రాచలంలో కలిపితే స్థల సమస్య పోయి పుణ్యక్షేత్ర ప్రగతి సాధ్యమవుతుందని వెల్లడించారు.

ఈ ఐదు పంచాయతీలు ఆంధ్రాలో ఉండటం మూలంగా, భద్రాచలానికి, తెలంగాణకు సరిహద్దు సమస్యల చిక్కులు కూడా వస్తున్నాయని, ఈ ప్రాంత ప్రజలందరూ ఎన్నో రోజులుగా తమ గ్రామ పంచాయతీలను తెలంగాణలో కలపాలని డిమాండ్ చేస్తున్నారని ఈ సందర్భంగా సీఎం, డిప్యూటీ సీఎంల దృష్టికి పొదెం వీరయ్య గారు తీసుకొచ్చారు.

దక్షిణ అయోధ్యగా బాసిల్లుతున్న, శ్రీ సీతారామచంద్రస్వామి వారు నడిగాడిన పుణ్యభూమిగా కొలవబడుతున్న భద్రాచల పుణ్యక్షేత్రం ప్రాధాన్యత దృష్ట్యా జూలై 6న తెలంగాణ, ఆంధ్ర ప్రదేశ్ రాష్ట్రాల ముఖ్యమంత్రుల భేటీ సందర్భంగా ఈ విషయంపై చర్చ జరిపి భద్రాచలానికి మేలు చేసేలా సానుకూల నిర్ణయం వచ్చేలా చూడాలని పొదెం ఈ సందర్భంగా సీఎం, డిప్యూటీ సీఎంను కోరారు.

పొదెం సూచనను స్వీకరించిన సీఎం రేవంత్ రెడ్డి,డిప్యూటీ సీఎం మల్లు భట్టి విక్రమార్క గార్లు సానుకూలంగా స్పందించారని ఈ సందర్భంగా పొదెం వీరయ్య గారు పత్రికా ప్రకటన విడుదల చేశారు.

ఇదిలా ఉండగా… ఇటీవల జరిగిన పార్లమెంటు ఎన్నికల సందర్భంగా కాంగ్రెస్ మేనిఫెస్టోలో భద్రాచలానికి చెందిన ఈ ఐదు గ్రామపంచాయతీలను తెలంగాణలో కలుపుతామన్న హామీ పేర్కొనబడింది.ఈ నేపథ్యంలో ఈ ఐదు గ్రామపంచాయతీలు తెలంగాణలోకి మళ్లీ తీసుకురావాలని కోరుతూ సీఎం రేవంత్ రెడ్డి, డిప్యూటీ సీఎం మల్లు భట్టి విక్రమార్క గారిని పొదెం వీరయ్య గారు కలిసి ఈ సమస్యను నివేదించటం పట్ల స్థానికుల్లో హర్షాతిరేకాలు వ్యక్తం అవుతున్నాయి.

ఈ ఐదు గ్రామపంచాయతీలను తెలంగాణలో కలపాలని ఆది నుంచి ఈ ప్రాంత ప్రజలు చేస్తున్న న్యాయమైన పోరాటానికి ఆనాడు భద్రాచలం ఎమ్మెల్యేగా ఉన్నప్పటి నుంచి కూడా వీరికి మద్దతు తెలుపుతూ ముందంజలో ఉండి పొదెం వీరయ్య గారు పోరుబాటలో నడిచారు.గతంలో అనేక ఆందోళనలో ఆయన పాల్గొన్నారు. ఈ క్రమంలో… రెండు తెలుగు రాష్ట్రాల ముఖ్యమంత్రులు భేటీ అవుతున్న నేపథ్యంలో ఈ ప్రాంతంలో ప్రధాన సమస్యగా ఉన్న ఐదు గ్రామపంచాయతీల వ్యవహారం తేల్చాలని, పుణ్యక్షేత్రం భద్రాచలానికి న్యాయం చేయాలని కోరుతూ…పొదెం వీరయ్య గారు సీఎం రేవంత్ రెడ్డి, డిప్యూటీ సీఎం మల్లు భట్టి విక్రమార్క గారిని కలవడం స్థానికుల్లో ఆనందోత్సవాలు వ్యక్తం అవుతున్నాయి.

ప్రజా సేవకులు అంటే, ప్రజా నేతలు అంటే పొదెం వీరయ్య గారిలా… పదవున్నా లేకున్నా… ప్రజల మధ్య ఉండేలా ఉండటం తమ అదృష్టం అంటూ… స్థానికులు పొదెం ఈ ఐదు గ్రామపంచాయతీల వ్యవహారంపై ముందు అడుగులపై ప్రశంసల జల్లు కురిపిస్తున్నారు