రైతులకు మద్దతు ధర – వ్యవసాయ భవితవ్యానికి వెన్నెముక.

నేడు పెసర పంటకు ప్రభుత్వ మద్దతు ధర 10,000 రూపాయలు, బహిరంగ మార్కెట్లో కేవలం 7000 రూపాయలు మాత్రమే.

నేటి గదర్ న్యూస్,
ఖమ్మం జిల్లా ప్రతినిధి,
✍️సతీష్ కుమార్ జినుగు.

వ్యవసాయం భారతదేశ ఆర్థిక వ్యవస్థకు మూల స్తంభంగా నిలుస్తోంది. ముఖ్యంగా తెలంగాణలో రైతులు పడుతున్న శ్రమకు తగిన గుర్తింపు లభించాలంటే, వారికి సరైన మద్దతు ధర అందించడం అత్యవసరం. ప్రస్తుతం కొన్ని పంటలకు, ముఖ్యంగా ప్రభుత్వం ప్రకటించిన పెసర పంటకు మద్దతు ధర పదివేల రూపాయలు ఉన్నా, బహిరంగ మార్కెట్లో మాత్రం ఆ పంట కేవలం ఏడువేల రూపాయలకే అమ్ముడవుతోంది.

ఇలా 3000 రూపాయలు మిగలడం అంటే రైతన్నకు ప్రభుత్వం ఎంతో సహాయం చేస్తుందని చెప్పుకోవాలి.

ఇలా ప్రభుత్వం నిశ్చిత మద్దతు ధరతో పాటు అదనపు బోనస్‌ను అందించటం ద్వారా, రైతుల ఉత్సాహాన్ని పెంచడం మాత్రమే కాక, కౌలు రైతుల్ని కూడా పంట పండించే దిశగా ప్రోత్సహించవచ్చు. ప్రస్తుతం అనేక మంది కౌలు రైతులు పెట్టుబడులు పెట్టేందుకు వెనుకాడుతున్నారు, ఎందుకంటే వారికి లాభం లభించే నమ్మకం లేదు. ఈ పరిస్థితి మారాలంటే, మొదట మద్దతు ధర పటిష్టంగా ఉండాలి. అదే సమయంలో మార్కెట్ లో ధర పడిపోతే, నష్టాన్ని భర్తీ చేసేలా అదనపు బోనస్‌లు ఇవ్వాలి.

ఈ విధంగా మిగిలిన అన్ని ప్రధాన పంటలకు కూడా మద్దతు ధరతో పాటు బోనస్‌ను ప్రభుత్వం ప్రకటించాలి. ఇది రైతుల ఆత్మవిశ్వాసాన్ని పెంచి, వ్యవసాయాన్ని ఒక ఆర్థికంగా లాభదాయకమైన రంగంగా మలచుతుంది. అలాగే, దేశంలోనూ రాష్ట్రంలోనూ ఆహార భద్రతకు పునాదులు కూడా బలపడతాయి.

అందుచేత, వ్యవసాయ రంగ అభివృద్ధికి రైతన్నలకు ప్రభుత్వం నుండి మద్దతు ధరల రూపంలో బలమైన తోడ్పాటు అవసరం. ఇది కేవలం ఒక్క రైతు సమస్య కాదు, ఇది సమాజ భవిష్యత్‌కు సంబంధించిన ఒక కీలక అంశం.