నేటి గదర్ న్యూస్, వైరా:
ఎదుటివారికి సాయపడాలంటే ఆర్థికంగా ఉన్నత స్థితిలో ఉండాల్సిన పనిలేదని, తోటి వారికి తన వంతు బాధ్యతగా సేవ చేయాలనే తపన ఉంటే చాలని ఖమ్మం జిల్లా వైరా మండలం సిరిపురం కేజీ గ్రామానికి చెందిన సోషల్ వర్కర్ షేక్ లతీఫ్ నిరూపిస్తున్నారు. గ్రామంలో ఒక చిన్న పంచర్ షాప్ నడుపుకుంటూ తన జీవనాన్ని కొనసాగిస్తూ, ఒక ఆటోను కొనుగోలు చేసి గత ఆరు సంవత్సరముల నుండి ఉచిత ఆటో సర్వీసులో వైరా, తల్లాడ మండలంలోని గ్రామాలలోని గర్భిణీ స్త్రీలను ప్రభుత్వ, ప్రైవేట్ టెస్టుల నిమిత్తం హాస్పిటల్ కి తీసుకెళ్లి మరలా గర్భిణీ స్త్రీ ని ఇంటి వద్ద దింపి రావడం జరుగుతుంది. ప్రభుత్వ పాఠశాలల్లో చదువుకునే నిరుపేద విద్యార్థులకు నోటు పుస్తకాలు, పెన్నులు, సిరిపురం ఉన్నత పాఠశాలలో చదువుకునే పదవ తరగతి విద్యార్థులకు గత రెండు సంవత్సరముల నుండి పరీక్ష ఫీజు చెల్లిస్తున్నారు. వారి సంతోషం నాకు చాలా సంతృప్తినిస్తుందని తెలియజేశారు. పదో తరగతి విద్యార్థులను పరీక్షా సమయంలో సిరిపురం కేజీ, ఉన్నత పాఠశాల గరికపాడు ఉన్నత పాఠశాల నుండి వైరా లోని పరీక్షా కేంద్రానికి తన ఆటోలో తీసుకెళ్లి తీసుకురావడం జరుగుతుంది. వేసవికాలంలో చలివేంద్రం ఏర్పాటు చేసి ఎందరో దాహర్తిని తీర్చడం జరుగుతుంది. ఆ సోషల్ వర్కర్ తన సేవా గుణాన్ని చాటుకున్నారు.తన గొప్ప మనసు కు సోషల్ వర్కర్ లతీప్ సేవలను మండల ప్రజలతోపాటు గ్రామస్తులు అభినందిస్తున్నారు.
