ఆగపేట గ్రామంలో నిర్వహించిన గ్రామ సభలో పలు ముఖ్య అంశాలపై విస్తృతంగా చర్చించారు. సర్పంచ్ కొత్త యాకయ్య గారి అధ్యక్షతన జరిగిన ఈ సమావేశంలో ఉప సర్పంచ్ కొమ్ము లావణ్య వార్డు సభ్యులు, గ్రామ కార్యదర్శి మురళి గారు మరియు గ్రామస్తులు పెద్ద సంఖ్యలో పాల్గొన్నారు.
సభలో ముఖ్యంగా వేసవి కాలంలో తాగునీటి కొరత లేకుండా ముందస్తు చర్యలు తీసుకోవాలని నిర్ణయించారు. నీరు వృథా కాకుండా ప్రతి ఒక్కరూ జాగ్రత్తలు పాటించాల్సిన అవసరాన్ని సర్పంచ్ గారు వివరించారు. చెరువులు, బోర్లు, ట్యాంకుల నిర్వహణపై ప్రత్యేక దృష్టి పెట్టాలని సూచించారు.
ఉపాధి హామీ పథకం పనులను గ్రామంలో మరింత వేగవంతంగా చేపట్టాలని నిర్ణయించారు. అర్హులైన ప్రతి ఒక్కరికి పని కల్పిస్తూ గ్రామ అభివృద్ధికి తోడ్పడే విధంగా పనులు చేపట్టాలని చెప్పారు. అదేవిధంగా గ్రామంలో ఉన్న కరెంట్ సమస్యలు, తరచూ ఎదురవుతున్న అంతరాయాలపై సంబంధిత అధికారులతో మాట్లాడి పరిష్కారం చూపించాలని తీర్మానించారు.
వీధి దీపాల మరమ్మత్తులు, కొత్త దీపాల ఏర్పాటు వంటి అంశాలపై కూడా చర్చించారు.
బతుకమ్మ ఘాట్ ఏర్పాటు విషయంపై కూడా సమావేశంలో ప్రత్యేక చర్చ జరిగింది. మహిళలకు సౌకర్యంగా ఉండే విధంగా ఘాట్ నిర్మాణానికి ప్రణాళిక రూపొందించాలని నిర్ణయించారు. గ్రామ అభివృద్ధి పనులు, నర్సరీలో మొక్కల పెంపకం, గ్రామంలో పారిశుధ్య నిర్వహణ వంటి అంశాలపై కూడా స్పష్టమైన కార్యాచరణ రూపొందించారు.
గ్రామ కార్యదర్శి మురళి గారు ప్రభుత్వ పథకాల అమలు విధానం, నిధుల వినియోగంపై వివరాలు తెలియజేశారు. గ్రామాభివృద్ధికి సంబంధించిన ప్రతి అంశంలో పారదర్శకతతో ముందుకు సాగుతామని తెలిపారు.
గ్రామాన్ని అభివృద్ధి దిశగా ముందుకు తీసుకెళ్లేందుకు అందరూ కలిసికట్టుగా పనిచేయాలని సర్పంచ్ కొత్త యాకయ్య గారు పిలుపునిచ్చారు.
