ఘనంగా బోనాల ఉత్సవాలు
జూలూరుపాడు, జూలై 14, నేటి గద్దర్ : మండల పరిధిలోని పాపకొల్లు గ్రామంలో వెలసియున్న కోట మైసమ్మ తల్లి కి ఆషాడ మాసం సందర్భంగా గ్రామంలోని మహిళలు ఆదివారం బోనాలు సమర్పించారు. పిల్లలు, పెద్దలు బోనాలను తలపై ఎత్తుకొని డీజే ఆట పాటలతో ఊరేగింపుగా గ్రామ బొడ్రాయి వద్దకు చేరుకొని పూజా కార్యక్రమాలు నిర్వహించారు. అనంతరం కోట మైసమ్మ తల్లి ఆలయానికి చేరుకొని అమ్మవారికి ప్రత్యేక పూజా కార్యక్రమాలు నిర్వహించి బోనాలు, మొక్కులు చెల్లించారు. ఈ సందర్భంగా వర్షాలు సమృద్ధిగా కురిచి, పాడి పంటలు బాగా పండాలని, గ్రామస్తులంతా ఆరోగ్యంగా ఉండేలా చూడాలని ఆ తల్లిని వేడుకొన్నారు. కార్యక్రమంలో గ్రామ పెద్దలు రోకటి సురేష్, రామిశెట్టి రాంబాబు తో పాటు మహిళలు, పురుషులు, పిల్లలు అధిక సంఖ్యలో పాల్గొన్నారు.
