రామన్నగూడెం ఆదివాసీల నిరాహార దీక్ష విరమణ: ఉమ్మడి సర్వేకు కలెక్టర్ ఆదేశాలు!
రెవెన్యూ, అటవీ భూముల వివాదంపై కదలిక; సర్వే నెంబర్ 30, 36, 39లో జాయింట్ సర్వేకు ఉత్తర్వులు.
నేటి గద్దర్ న్యూస్, అశ్వారావుపేట, సెప్టెంబర్, 29: అశ్వారావుపేట మండలం, రామన్నగూడెం భూ వివాదంలో కీలక పరిణామం, రామన్నగూడెం గ్రామానికి చెందిన ఆదివాసీలు చేపట్టిన నిరవధిక నిరాహార దీక్ష శుభప్రదంగా ముగిసింది. గ్రామంలోని సర్వే నెంబర్ 30, 36, 39 లలో ఉన్న రెవెన్యూ మరియు అటవీ భూముల మధ్య సరిహద్దు వివాదాన్ని పరిష్కరించేందుకు జిల్లా కలెక్టర్ గారు జాయింట్ సర్వే (ఉమ్మడి సర్వే) నిర్వహించాలని ఆదేశాలు జారీ చేయడంతో, గత ఎనిమిది రోజులుగా కలెక్టర్ కార్యాలయం వద్ద దీక్ష చేస్తున్న ఆదివాసీలు తమ దీక్షను విరమించారు. ఈ ఉమ్మడి సర్వే ద్వారా భూముల వాస్తవ సరిహద్దులు స్పష్టమవుతాయని, తద్వారా తమ భూ సమస్యకు పరిష్కారం లభిస్తుందని ఆశించిన ఆదివాసీలు, కలెక్టర్ ఆదేశాలపై హర్షం వ్యక్తం చేశారు. కలెక్టర్ కార్యాలయం నుండి ఉత్తర్వులు అందిన వెంటనే, ఆదివాసీ నాయకులు మరియు సంఘాల సమక్షంలో దీక్ష విరమణ జరిగింది. ఈ ఉత్తర్వులు భూ వివాదాల పరిష్కారంలో ఒక ముఖ్యమైన ముందడుగుగా పరిగణించబడుతున్నాయి.
