అశ్వారావుపేట మున్సిపల్ ‘రణం’: పీఠం దక్కించుకునేందుకు పార్టీల వ్యూహ ప్రతివ్యూహాలు!

​అధికార పార్టీలో టిక్కెట్ల లొల్లి.. ఏకమవుతున్న విపక్షాలు: మున్సిపల్ ఎన్నికల్లో మారుతున్న రాజకీయ సమీకరణాలు

నేటి గద్దర్ న్యూస్, అశ్వారావుపేట, (రిపోర్టర్: దాది చంటి) జనవరి, 23: అశ్వారావుపేట మున్సిపాలిటీకి తొలిసారిగా ఎన్నికలు జరుగుతుండటంతో స్థానిక రాజకీయం ఒక్కసారిగా వేడెక్కింది. మొత్తం 22 వార్డులను కైవసం చేసుకుని తన పట్టు నిరూపించుకోవాలని అధికార కాంగ్రెస్ పార్టీ భావిస్తున్నప్పటికీ, పార్టీ లోపల నెలకొన్న ‘పాత-కొత్త’ వివాదం తీవ్ర చర్చనీయాంశమైంది. ముఖ్యంగా రెవెన్యూ మంత్రి పొంగులేటి శ్రీనివాసరెడ్డి వర్గానికి, పార్టీలోని పాత తరం నాయకులకు మధ్య టిక్కెట్ల కేటాయింపు విషయంలో కోల్డ్ వార్ నడుస్తోంది; కనీసం 11 వార్డులైనా తమకు కేటాయించాలని పాత నేతలు పట్టుబడుతుండగా, మెజారిటీ స్థానాల్లో తమ అనుచరులే ఉండాలని మంత్రి వర్గం గట్టి ప్రయత్నాలు చేస్తోంది. మరోవైపు, అధికార పార్టీలోని ఈ అంతర్గత విభేదాలను ఆసరాగా చేసుకుని బలపడాలని బీఆర్‌ఎస్, బీజేపీ, జనసేన వంటి విపక్షాలు తెర వెనుక పావులు కదుపుతున్నాయి. ప్రభుత్వ వ్యతిరేక ఓటు చీలకుండా పొత్తులతో ముందుకెళ్లాలని ఈ పార్టీలు ఆలోచిస్తుండగా, యువత ఓట్లను ఆకర్షించేందుకు తెలంగాణ రాష్ట్రీయ లోక్ దళ్ వంటి కొత్త శక్తులు కూడా రంగంలోకి దిగుతున్నాయి. అటు కమ్యూనిస్ట్ పార్టీలు (సిపిఐ, సిపిఎం) కూడా తమ ఉనికిని చాటుకునేందుకు సిద్ధమవుతుండటంతో, అశ్వారావుపేట మున్సిపల్ పీఠం ఎవరికి దక్కుతుందనేది ఇప్పుడు సర్వత్రా ఆసక్తిని రేకెత్తిస్తోంది. వ్యక్తిగత ప్రతిష్టల కంటే మున్సిపల్ అభివృద్ధి, అధికారమే లక్ష్యంగా సాగుతున్న ఈ ‘వర్గపోరు’లో ఓటరు దేవుడు ఎవరి వైపు నిలుస్తారో వేచి చూడాలి.