వారెవ్వా.. అదృష్టం అంటే ఇతనిదే….

నేటి గదర్ న్యూస్,
ఖమ్మం జిల్లా ప్రతినిధి,
సతీష్ కుమార్ జినుగు.

తల్లి పుట్టిన రోజే అబుదాబిలో ఖమ్మం యువకుడికి వందల కోట్ల లాటరీ.

కష్టపడి జీవిస్తున్న సామాన్య యువకుడి అదృష్టం ఒక్కసారిగా పూసింది. తన తల్లి పుట్టిన తేదీ సంఖ్యతో లాటరీ టికెట్ తీసుకున్న యువకుడికి అదే టికెట్ అతని జీవితాన్ని మార్చేసింది.

ప్రపంచంలోని ఎన్నో కలలకూ ఇలా ఒక్కసారిగా తాళాలు తీయడమేనని గ్రామస్థులు ఆనందంగా చెబుతున్నారు.

విదేశాల్లో జీవిత పోరాటం..

ఖమ్మం జిల్లా వేంసూరు మండలం భీమవరం గ్రామానికి చెందిన బొల్ల అనిల్‌కుమార్ సాధారణ రైతు కుటుంబంలో పుట్టాడు. చిన్నప్పటి నుంచే కష్టాలు చూశాడు. ప్రభుత్వ పాఠశాలలో చదువుకొని డిగ్రీ పూర్తి చేశాక ఉపాధి కోసం విదేశాల్లో అడుగుపెట్టాడు. అబుదాబిలో సాధారణ ఉద్యోగం చేసుకుంటూ కుటుంబానికి తోడ్పడుతున్నాడు. ప్రతి నెలా తల్లిదండ్రులకు డబ్బు పంపడం అతనికి ఆనవాయితీ అయింది.

తల్లి పట్ల మమకారమే అదృష్టానికి కారణం..

ఒక రోజు లాటరీలు కొనుగోలు చేసే తరుణంలో 12 టిక్కెట్లు కొనుగోలు చేయగా అందులో ఒక టికెట్‌ తీసేటప్పుడు తన తల్లిపుట్టిన రోజు సంఖ్య 11 గుర్తుకు వచ్చింది. అమ్మ సంఖ్య నాకు అదృష్టం ఇస్తుందేమో అని ఆలోచించి ఆ సంఖ్యతో కూడిన టికెట్ కొనుగోలు చేశాడు. పెద్ద ఆశలేమీ లేకుండా ధైర్యంగా టికెట్ తీసుకున్న అనిల్‌కుమార్‌కు అది అతని జీవితాన్నే మలుపు తిప్పింది.

రూ.240 కోట్ల బహుమతి..

కొద్ది రోజుల క్రితం లాటరీ ఫలితాలు ప్రకటించగానే ఊహించని సంఘటన జరిగింది. తన టికెట్ నెంబర్ విజేతగా నిలిచి.. బహుమతిగా ఏకంగా రూ.240 కోట్లు తగిలింది. దీంతో అప్పుడే అబుదాబిలోనే అతని జీవితం కొత్త దిశలోకి అడుగుపెట్టింది. ఇక అతనికి ఏకంగా అన్ని కోట్లు లాటరీలో గెలుచుకోవడం నమ్మలేకపోయాడు. వచ్చిన ధనంలో తన తల్లిదండ్రులను సంతోషంగా చూసుకుంటూ, కొంత డబ్బును చారిటీకి అందిస్తానని అనిల్ పేర్కొన్నారు.

*గ్రామంలో ఆనందోత్సాహం..*

ఈ సమాచారం భీమవరం చేరగానే గ్రామమంతా ఆనందంతో మునిగిపోయింది. మన ఊరి వాడే కోటీశ్వరుడయ్యాడు! అంటూ ప్రజలు పూలమాలలతో, పేలుడు పటాకులతో సంబరాలు చేసుకున్నారు. కుటుంబ సభ్యులు తల్లి పట్ల ప్రత్యేక కృతజ్ఞతలు తెలిపారు. అమ్మ ఆశీర్వాదమే ఈ అదృష్టానికి కారణం అని చెబుతూ కన్నీటితో ఆనందం వ్యక్తం చేశారు.

వైరల్ అయిన ‘భీమవరం బాయ్..

సోషల్ మీడియాలో ‘భీమవరం బాయ్’ పేరుతో బొల్ల అనిల్‌కుమార్ కథ ఒక్కసారిగా వైరల్ అయింది. తెలుగు రాష్ట్రాల్లో అనేక యువతకు ప్రేరణగా నిలిచాడు. ‘ఒక్క లాటరీ టికెట్, ఒక్క సంఖ్య-కానీ ఆ ధైర్యం, ఆ నమ్మకం అతనికి జీవితాన్ని ఇచ్చింది. ఇది అదృష్టం కంటే పెద్దదే కష్టపడి జీవించే వాళ్లను దేవుడు ఇలా పరీక్షిస్తాడు.. తరువాత ఇలానే గెలిపిస్తాడు’ అని ఊరి పెద్దలు కొనియాడుతున్నారు.