భద్రాద్రి బీఆర్‌ఎస్‌లో కొత్త జోష్! అశ్వారావుపేట మండల కన్వీనర్‌గా జుజ్జురి వెంకన్న బాబు నియామకం

స్థానిక ఎన్నికలే లక్ష్యం: వంద శాతం గెలుపు గుర్రాలకే టికెట్లు – పైరవీలు చేయవద్దని జిల్లా అధ్యక్షుడు రేగా కాంతారావు హెచ్చరిక

నేటి గద్దర్ న్యూస్, అశ్వారావుపేట, నవంబర్ 15: భారత రాష్ట్ర సమితి పార్టీని జిల్లాలో మరింత పటిష్టం చేసే దిశగా భద్రాద్రి జిల్లా బీఆర్‌ఎస్‌ నాయకత్వం కీలక నిర్ణయాలు తీసుకుంది. పార్టీ కార్యనిర్వాహక అధ్యక్షుడు, మాజీ మంత్రి కేటీఆర్ ఆదేశాల మేరకు, ఖాళీగా ఉన్న మండల, పట్టణ బాధ్యుల నియామక ప్రక్రియను పూర్తి చేసినట్లు జిల్లా అధ్యక్షుడు రేగా కాంతారావు ప్రకటించారు. పార్టీ నిర్మాణం, కార్యకర్తలను సమన్వయం చేయడంలో కొంత ఇబ్బంది ఎదురైన నేపథ్యంలో ఈ నియామకాలు పూర్తి చేయడం ద్వారా జిల్లాలో పార్టీకి కొత్త ఉత్సాహం వచ్చినట్లు ఆయన తెలిపారు. ఈ సందర్భంగా, అశ్వారావుపేట మండల పార్టీ కన్వీనర్గా జుజ్జురి వెంకన్న బాబు ఏకగ్రీవంగా ఎన్నికైనట్లు రేగా కాంతారావు ప్రకటించారు. శనివారం నుండి వెంకన్న బాబు అశ్వారావుపేట మండలంలో పార్టీ నాయకులను, కార్యకర్తలను సమన్వయం చేసుకుని, పార్టీ అభివృద్ధికి కృషి చేయాలని జిల్లా పార్టీ పక్షాన ఆయన అభినందించారు. అధినాయకత్వం ఆదేశాల మేరకు, రాబోయే వారం రోజులలో జిల్లాలోని అన్ని మండల, పట్టణ అధ్యక్షులు/కన్వీనర్లతో ప్రత్యేక సమావేశం ఏర్పాటు చేయనున్నట్లు రేగా కాంతారావు వెల్లడించారు. ఈ సమావేశంలో రానున్న స్థానిక ఎన్నికలలో విజయం సాధించడమే లక్ష్యంగా పనిచేయడానికి ఒక ప్రత్యేక కార్యాచరణ ప్రణాళికను రూపొందించి, అమలు చేయనున్నట్లు ఆయన స్పష్టం చేశారు. జిల్లాలో జరగబోయే ప్రతి ఎన్నికలోనూ విజయం చేకూరే వరకు నాయకులు, కార్యకర్తలు అంకితభావంతో కష్టపడాలని ఆయన పిలుపునిచ్చారు. స్థానిక ఎన్నికలలో నూటికి నూరు శాతం గెలుపు సామర్థ్యం ఉన్న అభ్యర్థులకే టిక్కెట్లు కేటాయిస్తామని స్పష్టం చేశారు. టిక్కెట్ల కోసం ఎవరూ అనవసరమైన పైరవీలు చేయవద్దని ఆయన గట్టిగా హెచ్చరించారు. పోటీ చేయాలని ఉత్సాహం ఉన్నవారు తమ పూర్తి వివరాలతో కూడిన దరఖాస్తు లేఖను నియోజకవర్గ ఇన్‌చార్జిలకు, మండల/పట్టణ అధ్యక్షులకు లేదా జిల్లా పార్టీ కార్యాలయానికి అందించాలని రేగా కాంతారావు విజ్ఞప్తి చేశారు.